網民又整 tee 諷刺民建聯

[PoP]

來源：http://hk.news.yahoo.com/article/100329/4/h9ab.html

年宵時網民喺社民連攤位寄賣諷刺民建聯嘅「禮義廉」 tee 一度熱賣，搞到民建聯向海關舉報，話件衫侵犯版權，不過咁樣反而更加激起網民嗰團創作嘅火，除咗不斷設計諷刺民建聯嘅圖案，近日又再印製反民建聯嘅衫嚟買，今次就喺件衫度寫住「點止垃圾咁簡單」。

印「點止垃圾咁簡單」

今次呢件 tee 都係由網民設計，有個帶住防毒面具嘅人孭住個寫上「＃ HK5」嘅氧氣樽（＃ HK5 係 Twitter 內「5 區公投」嘅 tag），將一個都幾似民建聯 Logo 嘅標誌，掉落寫上「生命危害」嘅垃圾桶。今次呢件 tee 就賣 80 蚊一件，幫手印嘅網民扣除成本後，將全數收入捐去「5 區公投運動」嘅戶口，不過網上就未有公開究竟總共為「公投」籌咗幾多錢。

雖然件衫應該無畀人舉報話侵權，不過幫手同印衫公司聯絡嘅網友就話，自從用咗個電話號碼同印衫公司聯絡後，就收到好多怪電話，佢話自己一個內地朋友都無，但近日就收到內地打嚟嘅無聲電話。